కర్నూలులో ఘోర రోడ్డు ప్రమాదం : 15 మంది మృత్యువాత

వెల్దుర్తి: కర్నూలు జిల్లా వెల్దుర్తి సమీపంలో ఘోర రోడ్డు ప్రమాదం చోటుచేసుకుంది. హైదరాబాద్‌ నుంచి బెంగళూరు వైపు అతివేగంతో వెళ్తున్న ఎస్‌ఆర్‌ఎస్‌ ట్రావెల్స్‌కు చెందిన ఓ బస్సు గద్వాల వైపు వెళ్తున్న తుఫాన్‌ వాహనాన్ని ఢీకొట్టింది. ఈ ఘటనలో గుంతకల్లులో వివాహ నిశ్చితార్థ వేడుక ముగించుకొని తుఫాను వాహనంలో వస్తున్న 15 మంది మృత్యువాత పడ్డారు. ఘటనా స్థలంలోనే 13 మంది మృతిచెందగా.. చికిత్సనిమిత్తం ఆస్పత్రికి తరలిస్తుండగా మరో ఇద్దరు ప్రాణాలు కోల్పోయారు. వెల్దుర్తిలోని ఓ మలుపు వద్ద ఎదురుగా వస్తోన్న ద్విచక్రవాహనాన్ని తప్పించే క్రమంలో డివైడర్‌ను దాటి అటువైపుగా వస్తోన్న తుఫాన్‌ వాహనాన్ని బస్సు బలంగా ఢీకొట్టింది. వాహనంలో మొత్తం 14 మంది ఉన్నట్టు పోలీసులు వెల్లడించారు. ద్విచక్రవాహనంపై వెళ్తున్న ఇద్దరిలో మాసుం అనే వ్యక్తి మృతిచెందడంతో మృతుల సంఖ్య 15కి చేరింది. మరో వ్యక్తికి తీవ్ర గాయాలవడంతో చికిత్స పొందుతున్నారు. అతడి ఆరోగ్య పరిస్థితి విషమంగానే ఉన్నట్టు సమాచారం. ఈ ప్రమాదంలో వాహనం నుజ్జునుజ్జవ్వడంతో మృతదేహాలను బయటకు తీయడం ఇబ్బందిగా మారింది. మృతుల సంఖ్య మరింత పెరిగే అవకాశం ఉన్నట్టు తెలుస్తోంది. మృతులను తెలంగాణ రాష్ట్రంలోని గద్వాల జిల్లా వడ్డేపల్లి మండలం రామవరం గ్రామానికి చెందిన వారిగా పోలీసులు గుర్తించారు. ప్రమాద తీవ్రత దృష్ట్యా వాహనంలో ఉన్నవారంతా మృతిచెంది ఉంటారని పోలీసులు భావిస్తున్నారు.

నిశ్చితార్థానికి వెళ్లి వస్తుండగా.. 
నిశ్చితార్థానికి వెళ్లి అనంతపురం వైపు నుంచి గద్వాలలోని తమ సొంత గ్రామానికి వస్తుండగా ఈ విషాదం చోటుచేసుకుంది. వీరంతా ఒకే గ్రామానికి చెందినవారేనని.. సమీప బంధువులైనప్పటికీ.. ఒకే కుటుంబానికి చెందినవారా? కాదా అనేది తెలియాల్సి ఉంది. అనంతపురం జిల్లాలోని గుంతకల్లులో నిశ్చితార్థానికి  వెళ్లి తిరిగి వస్తుండగా ఈ ఘోరం జరిగింది. ఈ విషాదంతో ఎవరూ అక్కడ మాట్లాడలేని పరిస్థితి నెలకొంది. ఈ ప్రమాదానికి అతివేగమే కారణమని తెలుస్తోంది. ఆధార్‌ కార్డుల్లో వున్న సమాచారం ఆధారంగా మృతులంతా రామాపురం గ్రామస్థులుగా పోలీసులు తేల్చారు. వీరంతా కాసేపట్లోనే కర్నూలు దాటాల్సి ఉన్న సమయంలో ఈ ఘోరం జరిగింది. బస్సులో వున్న వారిలో కొందరికి గాయాలైనట్టు పోలీసులు తెలిపారు. వారిలో ఎవరికీ ప్రాణాపాయం లేదని తెలుస్తోంది. ఎంతమందికి గాయాలయ్యాయనే విషయం తెలియాల్సి ఉంది. ఘటనాస్థలాన్ని కర్నూలు జిల్లా ఎస్పీ ఫకీరప్ప పరిశీలించారు.

చంద్రబాబు,  కేసీఆర్‌ తీవ్ర దిగ్భ్రాంతి
వెల్దుర్తి రోడ్డు ప్రమాదంలో జోగులాంబ గద్వాల జిల్లాకు చెందిన పలువురు మృతి చెందడం పట్ల తెలుగు రాష్ట్రాల ముఖ్యమంత్రులు చంద్రబాబు నాయుడు, కేసీఆర్‌ తీవ్ర దిగ్భ్రాంతి వ్యక్తంచేశారు. మృతుల కుటుంబ సభ్యులకు ప్రగాఢ సానుభూతి తెలియజేశారు. క్షతగాత్రులకు అత్యున్నత వైద్యం అందించాలని చంద్రబాబు ఆదేశించారు. ఈ ఘటనలో గాయపడి కర్నూలు ఆస్పత్రిలో చికిత్స పొందుతున్న వారికి అవసరమైన సాయం అందించాల్సిందిగా జోగులాంబ గద్వాల జిల్లా కలెక్టర్‌ను కేసీఆర్‌ ఆదేశించారు.

మృతులకు జగన్‌ సంతాపం

ప్రమాద ఘటనపై వైకాపా అధ్యక్షుడు జగన్‌ దిగ్భ్రాంతి వ్యక్తంచేశారు. ప్రమాదంలో మృతులకు  సంతాపం ప్రకటించారు. మృతుల కుటుంబాలకు తన ప్రగాఢ సానుభూతి తెలిపారు.  క్షతగాత్రులు త్వరగా కోలుకోవాలని జగన్‌ ఆకాంక్షించారు. 

Leave a Reply

Your email address will not be published. Required fields are marked *