ధవళేశ్వరంలో యువజంట ఆత్మహత్య! కుటుంబ కలహాలే కారణమని అనుమానం

రాజమహేంద్రవరం : తూర్పుగోదావరి జిల్లా రాజమహేంద్రవరం గ్రామీణ మండలం ధవళేశ్వరంలో దారుణం చోటుచేసుకుంది. ధవళేశ్వరంలోని కొత్తపేటలో యువ జంట పురుగుల మందు తాగి ఆత్మహత్యకు పాల్పడింది. అయితే, వీరి ఆత్మహత్యకు కుటుంబ కలహాలే కారణమని అనుమానాలు వ్యక్తమవుతున్నాయి. ఈ ఘటనపై స్థానికులు, పోలీసులు తెలిపిన వివరాల ప్రకారం.. మృతులు ధవళేశ్వరానికి చెందిన తూరంగి జగదీశ్, రాజమహేంద్రవరం సీటీఆర్‌ఐ ప్రాంతానికి చెందిన తోట దీప్తిగా గుర్తించారు. ప్రేమ వివాహం చేసుకున్న వీరిద్దరూ కొత్తపేటలో గత ఎనిమిది నెలలుగా అద్దెకు ఉంటున్నట్లు స్థానికులు తెలిపారు. శనివారం ఉదయం మేడపైకి వెళ్లిన ఇంటి యజమాని వీరి గది తలుపు మూసి ఉండడంతో అనుమానం వచ్చి పోలీసులకు సమాచారం అందించారు. ఘటనా స్థలానికి పోలీసులు చేరుకొని గది తలుపులు తెరిచేసరికి ఇద్దరూ విగతజీవులై కనిపించారు. కేసు నమోదు చేసి దర్యాప్తు చేస్తున్నట్లు సీఐ బాలశౌరి తెలిపారు. మృతదేహాలను పోస్టుమార్టం నిమిత్తం రాజమహేంద్రవరం ప్రభుత్వ ఆసుపత్రికి తరలించారు. 

Leave a Reply

Your email address will not be published. Required fields are marked *