మనషులు మృగాల్లా మారుతున్నారు : సీఎం కేసీఆర్‌

హైదరాబాద్‌ : మాజీ డీజీపీ హెచ్‌జె దొర ఆటోబయోగ్రఫీ జర్నీ థ్రూ టర్బులెంట్‌ టైమ్స్‌ పుస్తకాన్ని ముఖ్యమంత్రి కల్వకుంట్ల చంద్రశేఖర్‌రావు గురువారం ప్రగతి భవన్‌లో ఆవిష్కరించారు. ఈ సందర్భంగా సీఎం కేసీఆర్‌ మాట్లాడుతూ.. సమాజంలో నేర ప్రవృత్తి పెరగకుండా నైతిక విలువలు పెంపొందించేలా విద్యా విధానం ఉండాలన్నారు. దురదృష్టవశాత్తూ సమాజంలో నేరప్రవృత్తి పెరుగుతుందన్నారు సీఎం. కొన్ని చోట్ల మనషులు మృగాల్లా మారుతున్నారని పేర్కొన్నారు. నేరప్రవృత్తి ప్రబలకుండా చూడాల్సిన అవసరం ఉందని సీఎం అన్నారు.

విద్యాసంస్థల్లో విద్యార్థులకు మంచి విద్యాబోధన చేయడం ద్వారానే నైతిక విలువలు పెంపొందించొచ్చు అని కేసీఆర్‌ చెప్పారు. విలువలు పెంపొందించే పాఠ్యాంశాలను వచ్చే విద్యాసంవత్సరం నుంచే బోధించాలని భావిస్తున్నామని సీఎం తెలిపారు. విలువలు పెంపొందించేలా పాఠ్యాంశాల తయారీ కోసం మాజీ డీజీపీలతో కమిటీ ఏర్పాటు చేస్తామన్నారు సీఎం. జీయర్‌స్వామి లాంటి ఆధ్యాత్మిక, ధార్మికవేత్తల సలహాలు తీసుకుంటామన్నారు. తెలంగాణను ఆదర్శవంతమైన సమాజంగా తీర్చిదిద్దడానికి పోలీసులు కూడా తమ విలువైన బాగస్వామ్యం అందించాలని సీఎం పిలుపునిచ్చారు.

కఠినంగా వ్యవహరించడం తప్పు కాదు

మంచిని కాపాడడం కోసం కఠినంగా వ్యవహరించడం తప్పు కాదు అని సీఎం అన్నారు. ప్రజాస్వామ్యంలో కొన్ని పనులు ఇష్టం లేకున్నా చేయాల్సి వస్తుందన్నారు. సమాజానికి మంచి జరుగుతుంది అనుకున్నప్పుడు కొన్ని పనులు కఠినంగా చేయక తప్పదని కేసీఆర్‌ స్పష్టం చేశారు. తెలంగాణ పోలీసులు సామాజిక రుగ్మతలు తొలగించేందుకు కృషి చేస్తున్నారని సీఎం పేర్కొన్నారు. శాంతి భద్రతల పర్యవేక్షణకే పరిమితం కాకుండా పోలీసులు సామాజిక బాధ్యతతో అనేక కర్తవ్యాలు నిర్వర్తిస్తున్నారు. గుడుంబా నిర్మూలన, పేకాట క్లబ్బుల మూసివేత, బియ్యం అక్రమ రవాణా అరికట్టడం, హరిత హారం ద్వారా చెట్లను పెంచడంలో పోలీసులు ఎంతో కృషి చేశారు అని సీఎం కొనియాడారు.

సంపూర్ణ అక్షరాస్యత కోసం ప్రయత్నించాలి

తెలంగాణ రాష్ర్టాన్ని సంపూర్ణ అక్షరాస్యత సాధించే రాష్ట్రంగా తీర్చిదిద్దేందుకు కూడా పోలీసులు తమ వంతు పాత్ర పోషించాలని సీఎం కేసీఆర్‌ కోరారు. ఈ సంవత్సరమే సంపూర్ణ అక్షరాస్యత సాధించే ప్రయత్నాన్ని ప్రభుత్వం చిత్తశుద్ధితో చేపడుతోందన్నారు కేసీఆర్‌. నిరక్ష్యరాసులందరినీ అక్షరాస్యులుగా మార్చే ప్రతిజ్ఞ అందరూ తీసుకోవాలి అని సీఎం కేసీఆర్‌ పిలుపునిచ్చారు.

దళితులు ఎదగాలి

దేశంలో మనం ఏ ఊరికి వెళ్లి వెతికినా దళితులే పేదలుగా కనిపిస్తున్నారని సీఎం తెలిపారు. ఈ పరిస్థితి పోవాలి.. దళితులు ఎదగాలన్నారు సీఎం. మనమెవ్వరమూ వెయ్యేళ్లు బతకడానికి రాలేదు. జీవించిన కాలంలో ఎంత గొప్పగా బతికాం, ఎంత ఆదర్శవంతంగా నిలబడినం అనేది ముఖ్యం అని సీఎం కేసీఆర్ పేర్కొన్నారు.

Leave a Reply

Your email address will not be published. Required fields are marked *