హైదరాబాద్‌లోని గాంధీ ఆసుపత్రి వద్ద వైద్యులు, నర్సులు, పోలీసులు, పారిశుద్ధ్య కార్మికులపై హెలికాప్టర్‌ల నుంచి పూల వర్షం కురిసింది. ఐఏఎఫ్ హెలికాప్టర్లు గాంధీ ఆసుపత్రిపై తిరుగుతూ పూలు కురిపించాయి.దీనితో కరోనా పోరాట యోధులకు అరుదైన గౌరవం లభించినట్లాయింది. ఈ విపత్కర పరిస్థితుల్లో నిస్వార్థంగా, అవిశ్రాంతంగా సేవలందిస్తూ పోరాటం చేస్తున్న కరోనా యోధులకు కృతజ్ఞతలు తెలుపుతూ సాయుధ దళాలకు చెందిన జెట్స్‌, రవాణా విమానాలు, హెలికాఫ్టర్లు దేశవ్యాప్తంగా వందన సమర్పణ చేస్తున్నాయి.

కరోనా రోగులకు సేవలందిస్తున్న కోవిడ్‌ ఆస్పత్రులపై హెలికాప్టర్లు పూల వర్షం కురిపిస్తున్నాయి. వైద్యులు, పారామెడికల్‌ సిబ్బంది, పారిశుద్ధ్య కార్మికులకు సంఘీభావంగా సాయుధ దళాలు ఈ కార్యక్రమాన్ని చేపట్టాయి.ఢిల్లీ పోలీస్‌ స్మారక చిహ్నం వద్ద పుష్పాంజలి సమర్పించి వందన సమర్పరణతో కార్యక్రమాలు ప్రారంభం అయ్యాయి. పోలీసు సేవలకు ప్రశంసగా ఇండియన్‌ ఎయిర్‌ఫోర్స్‌కు చెందిన చాపర్‌ పోలీస్‌ వార్‌ మెమోరియల్‌పై పూలవర్షం కురింపించింది.


ఈ క్రమంలో భాగంగా మరోవైపు ఎయిర్‌ఫోర్స్‌ జెట్స్‌ దేశ నలుమూలల సరిహద్దుల వరకు ఫ్లై పాస్ట్‌ను నిర్వహిస్తున్నాయి. ఐఏఎఫ్‌ సీ-130జే సూపర్‌ హెర్యూలస్‌ స్పెషల్‌ ఆపరేషన్స్‌ టాన్స్‌పోర్టు ఎయిర్‌క్రాఫ్ట్స్‌ రెండు జమ్ముకశ్మీర్‌లోని శ్రీనగర్‌ నుంచి బయల్దేరాయి. శ్రీనగర్‌లోని దాల్‌ సరస్సు మీదుగా ఛండీగర్‌లోని సుక్నా సరస్సు మీదుగా, దేశ రాజధాని ఢిల్లీపై ప్రయాణిస్తూ కేరళలోని త్రివేండం వరకు ఈ ఎయిర్‌క్రాఫ్ట్స్‌ చేరుకోనున్నాయి. ఆర్మీ బ్యాండ్స్‌ వైద్యశాలల వద్ద బ్యాండ్స్‌ను వాయిస్తూ దేశభక్తి గీతాలను ఆలాపిస్తున్నాయి. 

ఫైటర్‌ ఎయిర్‌క్రాఫ్ట్స్‌ సుకోయ్‌-30 ఎంకేఐ, మిగ్‌-29, జాగ్వార్‌ జెట్స్‌ సెంట్రల్‌ ఢిల్లీలోని రాజ్‌పథ్‌ మీదుగా ఎగిరాయి. 30 నిమిషాల పాటు విన్యాసాలు చేశాయి.  ప్రధాని పిలుపు మేరకు దేశప్రజలంతా మొదటిసారి బాల్కనీలో నిలబడి కరోనా యోధులకు సంఘీభావంగా చప్పట్లు చరిచారు. రెండోసారి లైట్లను ఆర్పేసి దీపాలను వెలిగించారు. తాజాగా ఆరోగ్య సిబ్బంది సేవలను కొనియాడుతూ సంఘీభావంగా త్రివిధ దళాలు ఈ కార్యక్రమానికి పిలుపునిచ్చాయి. 

మరోవైపు, ఆంధ్రప్రదేశ్‌లోని విశాఖలో నిలిపి ఉంచి నౌకలకు నేడు విద్యుత్‌ దీపాలంకరణ చేయనున్నారు. అలాగే, ముంబై, చెన్నై, కొచ్చిలోని నౌకలకు కూడా దీపాలంకరణ చేస్తారు. విశాఖలో వైద్యులను కలిసిన నౌకాదళ అధికారులు వారికి అభినందనలు తెలిపారు. ఛాతీ ఆసుపత్రితో పాటు వైద్యులపై నావికాదళ హెలికాప్టర్లు పూలు చల్లాయి.


నిరంతరం సేవలు అందిస్తోన్న పోలీసుల సేవలకు గుర్తుగా ఢిల్లీలోని పోలీసు యుద్ధ స్మారకం వద్ద వైమానిక హెలికాప్టర్లు పూల వర్షం కురిపించాయి. పోలీసుల గౌరవార్థం యుద్ధ స్మారకానికి వైమానిక దళాలు పూల దండలు వేశారు. గోవాలోని పణాజీ మెడికల్‌ కాలేజీ, వైద్యులు, నర్సులపై హెలికాప్టర్‌ నుంచి పూల వర్షం కురిసింది. దేశంలోని నలు మూలల ఉన్న కరోనా ఆసుపత్రుల్లో హెలికాప్టర్ల నుంచి పూల వర్షం కురుస్తోంది.

You Might Also Like