తెలంగాణ రాష్ట్రంలో లాక్‌డౌన్‌ కారణంగా చాలా రోజుల తరువాత వైన్స్‌లు తెరుచుకుంటున్నాయన్న వార్త విన్న మందుబాబులు తెల్లారకముందే వైన్స్‌ల వద్ద బారులు తీరారు.లాక్‌డౌన్‌ కారణంగా దాదాపు 42 రోజుల తర్వాత తెలంగాణలో మద్యం దుకాణాలు తెరుచుకున్నాయి. దీంతో మందుబాబులు ఉత్సాహంతో ఉరకలేస్తున్నారు. రెడ్‌జోన్లు సహా రాష్ట్ర వ్యాప్తంగా అన్ని ప్రాంతాలలోనూ ఇవాళ ఉదయం 10 గంటల నుంచి మద్యం అమ్మకాలు ప్రారంభించారు. మద్యం కోసం ఉదయం 8గంటల నుంచే మందుబాబులు షాపుల ముందు బారులు తీరారు.

ఆబ్కారీశాఖ ఆదేశాల మేరకు చీప్‌ లిక్కర్‌పై 11 శాతం, మిగిలిన అన్ని బ్రాండ్లపై 16 శాతం ధరలు పెంచి విక్రయిస్తున్నారు. కొండాపూర్‌లోని ఓ వైన్స్‌ ముందు మందుబాబులకు పోటీగా అమ్మాయిలు కూడా ఉదయాన్నే వచ్చి లైన్‌లో నిల్చున్నారు. సామాజిక దూరం పాటిస్తూనే మొహాలకు మాస్కులతో అమ్మాయిలు మందు కోసం పడిగాపులు కాస్తున్నారు.కంటెయిన్‌మెంట్‌ ప్రాంతాల్లో మాత్రం మద్యం దుకాణాలు మూసే ఉంటాయని అధికారులు తెలిపారు. మద్యం దుకాణాల వద్ద కచ్చితంగా భౌతిక దూరం పాటించాలని, ఎక్కడైనా దీన్ని ఉల్లంఘించినట్లు తెలిస్తే ఆ క్షణమే సదరు దుకాణం లైసెన్సు రద్దుచేస్తామని స్పష్టం చేశారు.


మద్యం దుకాణాలు ఉదయం 10 నుంచి సాయంత్రం ఆరు గంటల వరకూ తెరచి ఉంచుతారు. ప్రజలు క్రమశిక్షణతో, ఎడం పాటిస్తూ కొనుగోళ్లు చేయాలని,  మాస్కు ధరించకపోతే మద్యం అమ్మవద్దని, దుకాణాల వద్ద శానిటైజర్లు  అందుబాటులో ఉంచాలని సూచనలు జారీ చేశారు.మరో వై పు ఎండలు మండుతుండడంతో  రాష్ట్రంలోని పలు మద్యం దుకాణాల ముందు చెప్పులు క్యూ కట్టాయి. రాష్ట్ర వ్యాప్తంగా ఉష్ణోగ్రతలు అమాంతం పెరిగిపోయాయి. వేసవి తాపాన్ని తట్టుకోలేక మందుబాబులు చాలా చోట్ల మందుతో  తమ నోరు తడుపుకోడానికి తమ చెప్పులను ఇలా క్యూలో ఉంచి ఎండ నుండి తమను తాము కాపాడుకుంటున్నారు. మందుబాబులు సామాజిక దూరం కోసం ఏర్పాటు చేసిన మార్కింగ్‌లలో తమ చెప్పులను ఉంచి నీడకు వెళ్ళి కూర్చుంటున్నారు .

You Might Also Like